Нуянь Видяз
Арсеман, монь арсеман…
Азгондят, теке лытагай!
…Валскесь ушодовсь кода свал. Эль кенерсь менелень валдось састыне-састыне совамо вальматнева ды пештямо аксялкстнэнь, Теряй штавтызе лангстонзо кизэнь шождыне вельксэнть, чалгась кияксос ды ютась удалце кудонь вальманть икелев: мезе моли менельсэнть? Мезе полавтовсь? Тень топавтозь, ёрвалдызе шлямкайсэнть чаманзо, нардынзе кедензэ. Оршнесь ды лиссь, панжизе кудокенкшенть, кудыкелев. Саинзе чаво ведратнень ды мартост калдор-кулдор валгсь кузтемпес.
– Шумбрат, маней валске, шумбрат, якстере вановт чилисема! – паро ёжосо, марямга мерсь Теряй атя, мизолдыця чилисеманть якстере сёлмонзо лангс ванозь. Валтнэнь ёвтазь, сыргась пиренть трокс «викториянь» пандятнень юткова яннэванть лисьмалангов.
Таргась ведра ды жойсэ каизе эсензэ ведрас, амольдясь омбоце. Кандтнинзе-совавтнинзе кудыкелев ды кудос ведте пешксе ведратнень. Банянь уштомс кандсь кавто керьметь эчке, беряньстэ лазнозь пенгть, нардынзе голландкасто куловтнень, пештинзе ведте банянь ачеменииця покш кедьгенть. Эзь стувто, варштась кардазовгак – нолдынзе пиринестэст ды очкозост каясь товсюро саразтнэнень.
«Фу, окойники!» – мерсь эськанзо, валскень тевензэ прядозь, атясь. Сон арсекшнесь аламошкас новолемс кузтемпесэ тонадовозь эземнентень. Эзь кенере. Панжовсь пижесэ артозь кудыкельксэнь кенкшесь, ды кенкшалксонть лангс стясь Натуш.
– Тон курок? Стуворось учи, – верде атянзо лангс ванозь, мизолдозь, чевте пельвайгельть тердизе, прясонзо тейсь нулк-нулк, Теряень ярсамо, – кедеть илить стувто ёрвалдомс! Нардамокс нулатне, сапонесь – судот ало, неят.
– Паро, пельсекундань ютазь учок! – ахолдась кедьсэнзэ, серьгедсь Теряй пеедькшнезь, сиземань апак маря. Шлясь-нардась, ютась кузтемпе малас, каинзе пильгстэнзэ колошанзо, тонгсь кудонь карсемкайть ды совась кудос. «Мекс а улемс, а эрямс эрямонзо истямо вадря ёжосо? – кивчк ютась мелесь, Натушонь неезь. – Мекс а улемс истямокс течи, ванды, свал? Уле-арась истямо эрямо косояк?»
Учость Теряй атянь сывель марто пачалксинеть, велькссэ петезь кофе кечине ды Натушонь паневть капста марто чевте прякине. Сон нилинзе верьламбамодо таблетканзо, путсь икелензэ стуворонть лангс конёвлопа, мендизе чирева ды паро мельсэ кундась путозтнень «тевс нолдамо», итьмамо.
Натуш эзь карма атянзо учомо, ярсамонь кирданзо ютавтызе совамодонзо икеле. Ней летьке тенстьсэ ахолясь тей-тов, тенсесь киякс. Кирдемс ваньксчи – те, кода кортыть, верьсэнзэ. Теряй пеедькшнесь тень кувалма лангсонзо: «Тон спиртсэ, спиртсэ ёзык стуворонть, киякс лазтнэньгак куш иезэнзэ весть! Ве эрий бактерия кудонтень а кадови…».
Теряй ярсавсь, шлинзе мельганзо пенчтнень-вакантнэнь, ёвтась азоравантень сюкпря ды лиссь кузтемпес. «Зяро валдо, кенярксчи ушосонть! Иля нузялдо – амоляк!» – лип ютась пачканзо кеняркс раштый ёжо. Айгизе эземненть, ён улезэ озамс. Састыне, атякс, новольсь эйзэнзэ.
Те сонзэ, зярс ушосонть кизэ, зярс эзь кенере чалгамо сёксесь, вечкевикс тарказо. Ваны-арси, мезе тееви-моли менельсэнть, кона ёнов кирдить ки а капшиця ашо, лиясто качамо сэнь пондакш пельтне, мезе полавтовсь эсест ды шабратнень пиресэ. Кодат, мезде ансяк ледстнемат а содавтнесызь! Ледстнемат эйкакшпингедензэ, школасо ды лиясо-косо тонавтнема шкадонзо, кавксть урьвакстозь эрямодонзо, аволь аламо эрязь иетнеде…
Озы, нолдасы прянзо, нежедьсы мештезэнзэ улонзо, конясынзе сельмензэ, ды мекшвелекс совить прязонзо, а учить тердема, арсематне, ледстнематне теде-тонадо. Кодаяк тензэ превс а саеви, мекс моданть лангсо таштавсь зняро авидечиденть, мекс певтеме ламо ды визьксэнь апак сода кенгелить ды теить сонзэ, кенгелеманть, натой эрявикс коекс. Маряви, видечинтень озамо таркинеяк ломантне эзть кадо. Маряви тенст нулгодькс чинев кенгелемась медтеяк тантейкс. Те каня превс саеви? Пазонь кучовксокс ламот пряст ловить, тердить паронь, ансяк паронь тееме – раштыть кежть. Мекс истя, кодамояк логиканень а панжови!
Апак учо совась прязонзо мель: ютамс вирьга. Ледсь мелезэнзэ таркась, косо мелят увсо панжсть ды кецневтекшнизь Теряень валдо-сэнь покш пря баягинетне. Совась вирень латонть алов. Яксесь, вешнесь се тарканть, арсесь вастовомс ёвксонь кондямо мазый сэнь сельме балягиненть марто, талай. Стяко. Эзь муеве. Се мелят ульнесь. Тедеде… Виде, ламот-мезть эрямосонть вастневить ансяк весть! Иля вешне, ютазенть мекев а велявтсак. Тедеде кичиретнень ожосо артынзе шкерьгесь. Эрьвань эсензэ шказо.
Сизесь. Эртевсь вармадо умок сяворезь эчке пичес. Озась. Виресь чатьмонсь. Зяро эзь «стявтне» пилензэ, вейкеяк нармунь эседензэ эзь яволявто. Стувтокшнызе, сынь «яволявтнить» эседест капшазь, кода ломантнеяк, ансяк одшкастост. Ней… Ламот эйстэст уш чикуншка ёнот, ламот тона пелев кирдить ки. Саты, тесэнь кизэст ютась. Сёксесь оно, кадык зярс кекшнезь, чары-тандавтни ожосонзо.
Ваннось перьканзо, кунсолось. Окойники кепедизе вановтонзо вельксканзо капшазь уиця вецана, чопода тюс пельтнес. Сынст тунь а талновты ломантнень ютксо вейсэнь эрямост. Уить ды уить. Мезе тенст эряви, кинь вешнить?
Стясь ды теке янганть, чувтотнень-куракштнень юткова, апак эрязкале сыргась кудов.
Натуш латалдо ливтезь мокшнашка эземненть лангсо ватксесь модамарть, ватксезтнень кайсесь вакссонзо ведте пешксе кастрюлянтень – анокстась ярсамс. Маряви, таго карми човорямо вечкевикс памшамопелензэ – сывелень консерва марто томбазь-чевелязь модамарть. Оршазь авась шождасто, кизэкс, лавтовонзо ланга каязь човине коцтсто ковтыне, прязо штадо. Эно кода лиякс? Ушосонть гай умарьков!
– Косолить зярс? – прянь апак кепеде, тевензэ апак сезе, музгордезь пшкадсь сыця мирденстэнь. Пельдензэ валонь апак учо поладызе теке вешкезь «кортамонзо»: – Азгондят, теке лытагай, тев а муят… Шукшторовтне апак чуролгавто, апак керсе… Монтемень теяк теть а тееви, учат, яла мон, яла мон кундазан…
– Шказо аволь пелевень… – верьга, казямо вайгельсэ мерсь Теряй, истя ёвтазь валсонзо путызе тарказонзо аксун нинзэ, ваксканзо келейстэ эскелязь ютамсто.
– Тонь свал текесь, ансяк шканть таргсемс, – кепедизе прянзо тевстэнзэ, лотказевсь ватксемадояк, серьгедсь мельганзо, ильтизе келейстэ эскелязь ютыця Теряень.
Кузтемпес ды тосто кудос совамсто Теряй мериксэль: «Мон мезе, барщинас прям эцие? Лекстямс а максат! Эли батракокс сиведимик?». Кирдевсь, эзизе нерькста келензэ, оляс эзизе нолда пейтнень экшстэ. Астяко сеедьстэ ледстнесь Пушкинэнь: «Ды иля пелькстне чавола марто…».
Содась цёрась: гувкади толпандя, менельс кирнявтыть толкельтне. Пси карми. Теряй атя од шкастонзо, зяро иеть чадыведекс чудсть – а лововить, ловнокшнось кодамо-бути кулялопасто малав истямо «кортамонь» лувдо покш статья. Эйсэнзэ ледстневсть тувталтнэ, конат ветить истямо «важов- сёвномавтомо» эрямонтень.
Те сёрмадовкстонть кадовсь Терентий Тимофеевичень мельс истямо тев. Кодат-бути мелявкст телень куншкат, маней якшамо чистэ, ветякшнызь сонзэ тескень университетэнь педагогикань кафедрас.
Совась аволь покш нупальс. Икелензэ стуворост экшсэ нувсесть конёвост велькссэ ниле-вете аволь од, аволь сыреяк ават – тонавтыцят. Кода кирдевсь превсэнзэ – эйкакшонь оймень содыцят.
– Шумбрачи! – арсесь совицясь аватненень, лангаст вановтсонзо ютазь.
– Шумбрачи, шумбрачи! – гайгезевсть, пештизь нупаленть, вайгельть.
Аватнестэ, конёвост марто, Терентий Тимофеевичень вановтозо кепедевсь стенатнес. Эйсэст тердсть улемс истямокс, кодат сынь, инекс, модамасторонь келес содавикс педагогтне: Жан-Жак Руссо, Константин Ушинский, Антон Макаренко, Василий Сухомлинский, умонь угрась, мейле мадьярось Януш Корчак… Ютксост – вейкеяк ава! «Ха! Те кода истя? Кода чарькодемс?» – абунгадсь сыцясь.
Инжесь нолдызе прянзо. Валгсь менельстэ масторов: пшкадсь штадо пря, домкасто конёвост велькссэ «майсевиця» аватненень.
– Ёвтынк, энялдан: кить алкуксонь педагогтне? Цёратне, – Теряй невтсь кедьсэнзэ верев, – эли… аватне – тынь?
– Цёратне!!! – вете вайгельть апак тално, сеске серьгедсть вейсэ, пештизь жой вайгельсэст нупаленть. «Вай, авакай! Сынст мезе, тонавтызь истя вейсэ, велувсо сеереме?» – арсезевсь «апак учонь инжесь».
Теряй аймельгадсь, эзь сода, мезе меремс. Теке гамадизь пря ланга. Каня эрси истя?
– Мекс эно кафедрасонк, ванан, илядо покордаво, ансяк ават? Прявтонкак ава, – пшкадсь озадо аштиця тонавтыцятненень, лангозост вановтонзо кайсезь, ды теньсэ совавтынзе аёнчис, визделгавтынзе. Теевсь кашт.
Кода илязо уле, Теряй атя ловсь ды нейгак лови те сценанть-вастовоманть вельть ламодо кортыцякс. Сон корты васняяк теде: эйкакшонть тряст-кастост кавто – цёраломань ды тейтерьава, тетя ды ава, текенекс, ветицякс ютксост улезэ, малав свал, цёрась. Аволь чуросто Теряень содавтнизь Януш Корчаконь, ине педагогонть, валонзо: «Эйкакшт арасть – улеть ломанть».
Весе ушодови эйкакшпингстэ
Умок, пек умок редязь: ули тувтал ды ули эйстэнзэ лисиця поладкс. Те философиянь сыредеяк сыре коесь аравтни-вети тевтнень кода Моданть лангсо, истяня Менельде верьгаяк. Сонзэ виезэ редяви куш кодамо тевсэ-мелявкссо ды куш зярдо. Те коенть эрямостонть а ёртсак, виензэ а тертясыть.
Косто, кодамо юрсто ушодовсь Натушонь обуцязо – эрямс лепштязь пружинакс? Мекс кежтне сонзэ кивчкаить эрьва ёндо ды эрьва мезде? Кодамо, косо тувталось – кирваземс, теке сардыне, а истя, кодаяк чирьстэ ёвтазь валдо, а истя эскельдямодо, озамодо-стямодо эли лиядо-мезде? Мекс? Мекс эрьва штелькскеденть, кона чеменев эскеяк а ашти, гувкаи, теке толкель, сёвномо?
Неть ашожда кевкстнематне а весть сакшность Ёгань Теряень превс, а весть сезнизь удоманзо. Онкстнесь, ловнось, кочксесь, мель путсь чарькодемс сынст эрьва ёндо.
Сась мелезэнзэ Натушонь ёвтнемазо пиже шкадонзо. Сонзэ ульнесть колмо лелянзо. Меельгаст кемнилее иень ютазь авазо кандсь тейтерне. Очконардавкскенть лемдекшнизе Натальнекс. Кассь «покольнезэ» покштнень ютксо вейкине, тетявтомо эйкакшкекс – някинекс. Кудосонть мартонзо эйдень кельсэ кортниця-налксиця ялгине арасель. Ськамонзоль.
Мезе те вейкинесь, кодамокс кепети-касы, Наталень авазо, кода лелянзояк, эзть арсе. Эзть сода, превть эзть яжа ильведькстнэде, конатнеде аволь аламо лиснить вейкинетнень важдамсто-трямсто.
Васенцесь эйстэст – кольневтемась. Зярдо кудосонть, невтемга, колмо эйкакшт, тенст эрявиксэсь (налкшкетне, ярсамопельтне, оршамотне…) явови вейкетьстэ – колмов, зярдо вейке – весе, петнявкскень пес, понгить сонензэ: мезеяк тантейне, вечкевикс, мазыйне налкшке… Понги тензэ, текенекс, седе ламо, аволь кодамояк колмоце эли нилеце пелькске. Мезе веши, кодамо питней, чуросто вастневиця илязо уле, – муема ды путома икелензэ. «Покольнентень» – весе. Эрьва кода савтнить тензэ! Истя кемекстави пакшанть превсэ-седейсэ мелесь: «Весемеде покшось, эрявиксэсь, виевесь, вечкевиксэсь модамасторсонть – мон! Вейкень пес, мезе перькан, – васняяк монень! Лиятнеде, кить перькат, а мезть мелявтомс, стувтыть. Прявтось кудосонть – мон».
Тевтнень, конат теевильть пакшантень, тейсь тарказонзо авазо, эзь кармавто тяканзо, сыргози, тарканзо ацамо, эзь тонавто лиянь мелень ваномо. Эзь чарькоде авась, три истя эсь прянь вечкиця, эрьва челькинеде кежиявтниця, ордакш, натой аксун ломань. «Кода а вечкемс эсь умарнеть!» – марсевсь кургстонзо, яла идесь эсь прянзо. Эзь арсе – колы тень эйсэ умонь пингень превспутоманть: «Вечкть эйкакшот удомстонзо эли зярс кельги путомс эзементь трокс». …
Ламот, секень вант, се шкань эрицятнеде эзизь сода те валмеревксэнтькак: «Вейке эйкакш – а эйкакш, кавто эйкакшт – пельэйкакш, колмо эйкакшт – эйкакш». Неень аватнедеяк, маряви, аволь ламо кить марсизь неть сырнень валтнэнь, содавлизьгак, «някат» авольть чачтне, теевельть истя, кода кортави валмеревкссэнть.
Мезес пачти эйкакшонь сокор вечкемась, Теряйнень шабрань кедьстэ превть кевкстнемс эзь савкшно. Сонензэ содавикс вейкинень важдамось. Покш ды веженсь цёранзо ютксо – кавксо иеть. Лиссь истя: кавксть кавксо, иеть нинзэ марто трясть-кастсть кавто ськамонькай цёрынеть. Васенценть школав туема шкастонзо – уш покш цёрынель – чачсь ялакскезэ Вежай, теяк, ловт, кассь ялгавтомо. Видяй лелянстэнь уш кавксо, сонензэ… Ве кель-вал муемс зняро иень авейкетьчисэ ашождыне. Сестэ Теряйнень эзь чарькодевкшне, одоль, мезе те улемс тетякс содыль аламо, превскак эзь сакшно, кодат тешкскеть кады обуцязост ялгиневтеме касомась, кадык ланга-верьга – кольневтнематне.
Эскелясть иеть… Эрьвань апак неяво, састыне кассь эсензэ, кодамо илязо уле, корозо. Кодат челькеть сынь, неть явовтыця иетне, кадсть уцясказост, Теряй содасы…
Кавксо иеть… Натальне сась модамасторонть лангс веженсь лелянзо чачомадо мейле кемнилее иень ютазь! Юткось покш. Шкатнеяк лиятальть. Секс тейтернесь кенерсь таштамо ськамонькаень обуцянь ёнкстнэде ламоксть ламо.
Теяк: Наталень аванзо коряс Теряй ламодо од, сюпав, кода тетя, содамочисэ, ламо тонавтнесь, ловнось, сёрмадомань вечкиця. Наталень авазо ульнесь сёрмас а содыця велень ломань. Секс кольневтсь «левкскензэ» кода ды мейсэ маштсь, буень апак сода. Теке марто, тиринезэ кадсь тензэ питнейдеяк питней казне – тевень вечкема. Тевтне, асатыкстне войнань ды мельганзо иетнестэ прядо велькскальть. Теяк, кудосонть колмо цёрат. Кие карми лездамо аванстэнь кудонь, кардазонь ды пирень тевтнесэ? А эйкакшост ваномо кие карми?
Весть чокшнеланга, мадемде икеле Натуш марто кортнемстэ, зяро ды зярдо чачтозь улест кудосонть-семиясонть эйкакштне, Терентий Тимофеевич видькстась:
– Кадык ламо иень ютазь, ялатеке улест полатнень эйдест кавто эли, седе паро, – колмо. Кадык кемень, ансяк аволь вейке! – путсь пе кортамонтень.
Эйкакшпингень кольневтнематнеде се тейтерненть, ней Наталень-Натушонь, превсэ-оймесэ кирдеви вейке: «Мон сехте-сехтесь тевсэ, кортамосо, превсэ, сюпавчисэ ды мазычисэ… Монь кондят арасть». Марясь эсь прянзо Модамасторонь почокс! Паро, эзь марсеве: мон – паз! Сонзэ мельсэ теке: «Улезэ ансяк монькс! Кунсолост ансяк монь, монь, каршо валт илязт марсеве! Монь мелем улезэ топавтозь нейке! Учомат илязт уле».
Кодамо тев а топавтови лиянь, аволь сонзэ, кедьсэ – берянь, теевезэ, байгинень пес, ансяк сонзэкс. Мезе илязо топавто Теряй, тейсы низэ эсензэкс. Секс сон мель путы кой-зярдо «оргодемс» те эли лия тевденть. Кода иляк тее, ялатеке а савтсак, мелезэнзэ а туи, ялатеке одс тейсы. Виде, тейсы, кода мери Теряй атя, ветень питне, нардевстэ. Тенень, виень апак вансто важодемантень, тонавтызь, авазо ды се шкань эрямонь стакачитне, ламодояк ламо кудоютконь ды пирень-кардазонь тевтне, сынь ульнесть пакшантень паро важдакс.
Капшиця. А явсак обуцястонзо те ёнкскенть. Мельганзо, кода иля эрязкале, а кенерят. Куш кодамо тев кедьсэнзэ палозь палы. Лисни, а мезть сёпомс, свал эрязкалемадонзо, лиясто мекевлангт, мезеяк правты, порксы, колы, пулты…
И-и-и, ды мезть кортамс кольневтнематнеде! Ульнесть сынь ютазь пингень 30-40-це, Теряень ды Наталень чачома иетнестэяк. Ульнесть свал. Свал содыльть, мезес пачти пакшанть марто цильнемась-эльнемась. Содыльть, кодат зыянт теевить корсонзо. Тевесь сеньсэ – вастневсть умонь шкатнестэ ськамонькайтне вельть чуросто. Сестэ текенекс арасельть а телевизорт, а Интернет, а телефонт-мезть. Сынь васень кольевтицятне! Телеэкранонть лангс ванозь стувтсыть теветь вейкень пес.
«Кудораськетнеде ней, – ловнось Теряй атя аволь ансяк конёвонь, электрононь лисьматнестэяк, – косо кастови вейкине цёрыне эли тейтерне, ламодояк ламо. Паро, бути кастыцятнеде кавто – тетя ды ава. Ризкс сыргозти, вельть ламо пакшатнень кастыцяст мирдевтеме аваломанть. Тень эйстэ ушодовияк кажонь кувака-эчке пиксэсь. Тетя мартояк, пешксе семиясо, ашождыне кастомс ламонь содыця, шумбра ды седеймариця ломань. Мезть кортамс сестэ, зярдо кудосонть прявтось ськамонзо ава ды важды-три ськамонькай, кона кудосонть авадонзо азор! Важдамонь ды кастомань мелявкстнэ весе те пайстомо ломаненть лавтов лангсот!
Превей валмеревксэсь: вейкенть пильге лангс стявтомс – кементнеде стака. А кие карми чачтнеме седе ламо? Кие, бути пеледест ламо полыицятне срадыть кавто ёнов, явить, ансяк кенери прядовомо «Чапамо!» пижнемась? Явомась ламонь кувалма улияк пандякс, косо чачить ськамонькай аватне вейкине пакшаст марто.
Ломантнень обуцянь коряс нилев явомадост Теряй атя од шкастонзо кой-мезе ловнокшнось. Те ульнесь умок. Куроксто институтонзо прядозь. Важодсь, эрясь сестэ велесэ. А вана неть читнестэ сельмензэ икелев понгсь кулялопань аволь покш-келей сёрмадовкс. Ловнызе шкань апак таргсе. Сон келейгавтынзе атянть икелень содамочинзэ обуцятнень авейкетьчидест.
Модамасторонть лангсо, кемексты сёрмадыцясь, ломантне явовить корост кувалт кавтов: васенцетне холерикть ды меланхоликть. Эйстэст седе ламонтне а маштыть пряст тертьсэ кирдеме. Кирьвалить, ловт, тувталтомо, стяконь тевде. Сёвномас пачколить, кода кортыть, потсезь аллукшонь кискак. Вастневить ютксост мик истят, конатне псинь пачк кайсевить тюремас, пачколить лакиця кежень пачк пеельс автордамоскак. Ламот эйстэст эрязкалицят.
Ламонь содыця алтымась Теряй атянь «психопаты» кевкстеманзо каршо ёвтась истямо куля: истят ломантнень полыямсто, седеяк бути вастовить кавто вельть пси, акирдевикс обуцят, паро вейсэнь эрямосост а ули. Неть ангоря валтнэ аволь чуросто сакшность инжекс ды талайс кадновсть алтымас совсицянть превс. Психопаттнэ холериктнень эли меланхоликтнень эйстэ.
Омбоце куронтень совить сангвиниктне ды флегматиктне. Сынст корост седе сэтьме, чевте, «эсь кедьсэ» кирдевиця, потыцяя. Аволь чуросто а капшицят. Конатнеде седе ламо, статьясонть апак тешкста.
Натушонь обуцязо, сась мельс Ёгань Теряй, а савкшны кавтолдомс, холериктнень эйстэ. Секс эрямось мартонзо – аволь ламбамо. Сави Теряй атянень эрямс, кирдемс прянть ванозь ды ванозь. Седеяк «толормазо» пурны вийть сыречи ёнов. Кирдема мельсэ теньгак: эрьва кувтасонть кодат корт-обуцят ансяк а вастневить! Паряк, тёжа, паряк, миллион. Эсь прянзо Теряй атя лови флегматикекс. Астяко сонзэ кургсто сеедьстэ марсеви: «Састо чият – васов туят». А вана Натушонь вечкевикс валозо допрок лия – «курокке»: «курокке ютака ловсо мельга!», «пенгинеть курокке совавтт!». Ков а эскельдят – курокке, нейке, эрезасто!
Эсь лемень кемекстамга, невтемс эсеть покшокс, виевекс, прявтокс ялгать ютксо, эрявсь кенеремс эрьва месэ, теемс тевтнень куроксто. Те ульнеськак ушодксокс Натушонь эрямосо..
Книгань чачома чи
Кинь кодамокс Чипазось шкинизе-кепедизе. Лиякс а тейсак. Иля педсеяк. А полавтсак эсь пряткак. Куш ламо мезе ашти эседетькак. Эрьва кодат тевтнеде, профессиятнеде модамасторонть лангсо тёжа, паряк, кавксть ламо. Сынь, яла кортыльть, Сонзэ, Пазонть, пельде. Вейкенень улемс сёрмадеекс, омбоценень – наймансо-косо кедень венстезь трёшникень пурныцякс. Кинень мезе кучови…
Черькаень Натальнень Пазось казсь, васняяк, аволь кодамояк седейс педиця, вечкевикс тев, а рунговий ды иерачи. Яжи карязонзо пиресэ-косо чоподасто чоподас, «сизинь» валонть ялатеке а марясак. Зярс тевенть а «калгасы», мерть-иля, – а кадсы. Кшни. Улемс истямо иеракс максови чуросто кинень. Теряень валонзо коряс, Натуш – трактор. Анок сокамо-изамо аволь ансяк чить, ветькак. Вечкеви тензэ, зярдо те валсонть пшкади тензэ атясь, мизолкстонть турванзо редявиксстэ явовить.
…Ансяк прядызь валскень ярсамост, Теряй атя ёрвалдызе симнема кечинензэ ды одс новольсь тарказонзо, кепедизе вановтонзо икелензэ стядо аштиця, нардамосо кедьгетнень эрязкалезь нардтниця Натуш лангс. Турвасонзо кирдевсь салавань мизолкс. «Мезе-бути вечевикс ледсь мелезэнзэ..,» – арсезевсь Теряй.
– Мон вана мезде арсян, – нежедсь кенерепакарьсэнзэ стуворонь чирентень ды пшкадсь, сельмезэнзэ ванозь, нинстэнь, – ютавтомс малавикс читнестэ покшчинь кондямине книгам лисеманзо тешкстамга. Кода тон арсят?
– Паро, мелесь аберянь. Каршо а молян. Ды седе ён карми – чопотьёнов, кодаяк сисем час малава, – аламос учозь путсь пе Теряень «арсематненень» авась, тевензэ апак кадо. – А зярдо, кодамо чистэ? – ёлк варштась поланзо лангс кевкстемстэнзэ, лип шкас чувтомсь, лотказевсь кечинетнень-вакантнэнь калдор-калдор таркаваст путнемедеяк.
– Монь койсэ, ванды, шканть а мезть ютавтнемс, те карми таргочи, – мерсь Теряй сеске, апак арсе, кончтась мизолдозь нинстэнь ды нолдызе вановтонзо. – Течи – ёвтама.
– Кинень? – валонть лангс лепштязь, кевкстизе атянзо Натуш, сонсь понгавтызе оля кедьсэнзэ нардамонть тарказонзо, шождасто лекстясь ды озась стуворонть песэ эземнентень. Валскень перть пильге лангсо, сизесь.
– Монень маряви, апак кевкстнеяк содави: Промо Валянень, Ашо Любанень ды Алё-Алексеичнень Груня марто. Кинень лиянень? – Терентий Тимофеевич мельга-мельцек ёвтынзе лемтнень, кинь марто велесэ эрямсто савкшны пшкалемс, яксевтемс кой-кодат пирень-кудоютконь тевть, кить велесэнть весемеде содавикст. Нурькинестэ – шабрат. Атянть чевте баритонсо марявсь паро, эрьвела ёжо. – Мон вечкан вишка пурнавкскеть. Эйсэст эрьвась неяви-маряви, кунсолови.
– Истя. Сынст марто содавикстано. Вакссонок эрицятнень тердемс? Мезекс?.. Сынь рузт. Эрзякс вал а чарькодить, – поладызе кортамонть, Терентий марто вемельс прась, Натуш, черьк-черьк тейсь прясонзо, казизе лембе вановтсо каршонзо озадо аштицянть, веркасто стясь таркастонзо ды эземнензэ кандызе-путызе икеле кудос.
Теряй «кардазкс» оршнезь лиссь, нинзэ апак учо, ушов. Совась латалов, сайсь узере, деряба ды ютась мартост пичень аволь эчке чочкотнень ваксс. Аравтызе седе ёнсто «сеянть», кепедсь лангозонзо чочко. Сась Натуш, ды кундасть арсезь тевест топавтомо: пильсеме-лазномо, пенгтнень латалов кандтнеме.
Котьмасть чикуншкас.
Шлямодо-ярсамодо мейле Теряй атянень низэ макссь од «покш» тев: молемс лавкав, рамамс кавто копшат (раужо ды ашо) кши, кавто кувтат сал, кото кельмонькайть. Теке басом омбоце кармавтома: тов молемстэ, зярс чавонь кедть, совамс ды тердемс валскень «мероприятиянтень» Любань ды Валянь, Алёнь ды Грунянь.
Изнявсь те тевеськак.
Натуш, пекекиське лангс мадезь, штапо ашти латалкс икеле путозь менчевиця кониккесэ – ченти-тюжалгавты рунгонзо. Те, яла сон мери, максы шумбрачи, вий ды, путт, – мазычи. Улеть те меленть каршо молицяткак. Сон сынст а кунсолы, сонзэ эсензэ вановтозо. Сеске, невтемань кис, ледстясынзе эрицятнень, кить мезе те ловось а содыть.
– Кудосольть Валят-Любат? – кепедизе прянзо, варштась ды кевкстизе мирдензэ тюжа рунго, теке неграва, Натуш. Кевкстизе ды мекев путызе пацясо копачазь прянзо судонзо ало тодовненть лангс, черьказевсь, седе ёнсто аравтызе кутьмерензэ чинть каршо.
– Кудосольть… Любанень, кода свал, эль совавинь, байтяк савсь брикстяемс пильгсэнь кардазонь кшнинь кенкшезэнзэ. Валя сюлмсесь кудост икеле пиринесэнзэ помидорт. Мерсть сатано. Пачколинь Алёмезненьгак, – пачтясь Теряй якамодонзо, Натуш вакссо стядо аштезь ды чентязь кутьмерензэ сельмень сявадозь ваннозь.
Чокшнень ярсамодо мейле атят-сырькайть совасть икеле кудос ды талай онкстнесть, кода ютавтомс вандынь чокшненть, чапсть-вачкасть программань кондямо. Арсесть, яжасть превть теемс сонзэ мельс туицякс, эрьвелакс, ёжонь эждицякс. Састь мельс: течи чопоньпелев, зярдо матравить тевтне, Натуш моли Промо Валянень – морсесызь тешкстазь моротнень, теить репетициянь кондямо. Берянь – баяномо…
…Сась кортазь шкаськак. Васенцекс пачкодсь, ютась кузтемпес лагоря рунго, кирьксала, тюжа тюс чама, мереват чиёнксонь эриця, Ашо Люба. Шумбракстнесь вастыцянть, Натуш сырькаенть марто, ды озась эземс. Мельганзо невтизе прянзо, сась пирень кувалт пелеве ёнонь янганть келей чама, аволь сэрей, сень кис эчке, ведьгеменьшка иесэ Промонь Валя. Сеске сонзэ мельга лоткавтызь урныгаест кшнинь кенкшенть икелев Алё-Алексей ды Груня. Шумбракстнесть-тейсть, кайсизь карсемаст ды азортнэнь марто совасть, кортнезь-пеедькшнезь, кузтемпестэ икельце кудос.
– Ойседе, ялгат, ки косто тарка муи. Тынь, Алё ды Груня, вана тезэнь, диванс. Валя ды Люба – кенкш вакссо креслатнес. Минь атянть марто каршонк – стядо. Ойсевиде? Паро, паро! Мезе, ушодтано? – Гайги вайгельсэ яволявтсь Натуш, прок икелензэль пешксе зал кунсолыцят, – шканть а мезть ёмавтнемс.
Лангсонзо ожань таркас «сёлмине» марто вечкевикс сэняжа ковтазо ды чопода-сэнь теине пиьге понкст. Турванзо эль редявиксстэ токазь якстересэ.
– Мезень кувалма серьгедидизь – содатадо. Терентий Тимофеевич якась, ёвтась тенк. Ледстяса. Неть читнестэ лиссь романозо. Ну, ды сынек мельс ютавтомс тенень алтазь эсенек юткова вастовома. Атясь лемдизе, паряк, аламнеде верьга ёвтазь, Книгань чачома чикс. Вот так вот. Мезде-кода книгась, ёвтнесы сёрмадыцясь. Ёвтат, атя, ниле-вете валт? – пшкадсь Натуш гайвайгель вакссонзо аштиця, рунгонзо видестэ кирдиця поланстэнь, варштась лангозонзо ды мизолдозь путызе вить кедензэ лавтовонзо лангс.
Терентий Тимофеевич лангсо куштаза тюс, ланга нолдазь, мештьсэ кавто зепине марто панар, теке тюсонь понкст. Теде неявсь сэрдензэ аламнеде сэрейкс ды натой одокс. Атясь талнозевсь. Теке сави тензэ вал кирдемс студентэнь аудитория икеле ды аволь ве часонь перть.
– Ламо ды мазыйстэ кортамонь талан тень эзь максо Инешкипазось. Седе ён монень кортамс конёв вельде. Нурькинестэ. Костонь мон, кодамо буень-ёнксонь – марсиде. Вана книгась, конань кувалма вастовинек, – невтизе сэнела, цитниця ланго книганть. – Лангсонзо псилгалинь-котьминь кавто иень перть. Лиссь неть читнестэ, лемезэ, кода несынк, «Валдоня». Эйсэнзэ ёвтневи умок, войнадо икеле, чачовт, кувать эриця эрзянь авадо. Ёвтневи се шкань стакачитнеде, эрямодонзо, мирдедензэ, эйкакштонзо – колмо цёрадонзо. Тетяст-аваст сынст – тонавтыцят. Пинге важодсть школасо. Колмонест цёраст, сы шка, идить докторонь диссертацият, кармить профессорокс. Те книгась – семиядо-эрямодо роман. Вана, нурькинестэ, «Валдонядо». Кой-кува, лиякс ёвтазь, кекшнезь, ёвтневи Пичеледеяк.
– Ужока, ужока, атя, вельть уш… седе нурькинестэ, путындерят мель, а лиси? – полашт варштась Натуш «залонтень», прок пеняцясь тензэ ветицянть лангс, ды мизолдозь пшкадсь вакссонзо кедензэ нолдазь, палманькс аштиця атянстэнь. Сельмсэнзэ «ветицянть» налксесть кенярксонь сяткинеть.
– Теряй леляй, – пстылязевсь таркасонзо, серьгедсь верьга вайгельть, мик якстерьгадсь, Алё, – мекс книгат истя лемдик?
– Вана мекс, Алё ялаксом. Берянь, истят ломантнеде, кодат литературань монь откертне, пектеяк пек аламо. Сынь ловность аволь ансяк мезе максовсь уроксо, ловность ламо лия эрьва кодамо литература, ловность свал, ламо содасть, кандсть, алкукскак, велень эрицятненень покш культура. Секс истя лемдия. Истят превей, ванькс ойме ломанть, вастневить, эряви видькстамс, чуросто, – Терентий Тимофеевич, Алё лангс ванозь, таргась понксзепстэнзэ пацине, нардызе ливезев чаманзо, турванзо ды путызе тарказонзо. – секскак ризкс куродтанзат – марят куля превей ломантнень, васняяк сёрмадейтнень, пансемадост лиякс арсемаст кис.
– Тон таго кувакасто, вот так вот… – эзь кирдеве Натуш, сезизе поланзо кортамонзо, прясонзо тей-тов чиремтнезь, пеняцясь, мекс эзизе топавто икеле ёвтазь мелензэ.
– Вана мезе стувтынь ёвтамс, нолдынк чумом, – путызе вить кедензэ мештезэнзэ ды поладызе кортамонзо сёрмадеесь, прок эзинзе маряяк нинзэ кардамо валонзо, – книгасонть невтеви ламо иень перть веленть эрямозо, ютазь пингень колоньгеменце иетнестэ саезь меельце шкас. Теяк, ловныцясь вастови сеть кувака ды нурькине моротнень марто, конатне морсевсть велесэнть сеть, ней уш умонь, иетнестэ, карми содамо, кода ютавтнесть оля шкаст од ломантне, кодат ульнесть покшчить, койть-кирдат…
Васенцесь сеть моротнестэ «Вай, верьга, верьга…». Ну, кода, Натуш-сяткинем, серьгедьсак? – Теряй велявтсь вакссонзо стядо аштиця нинзэ пелев, варштась – кивчк кирнявтсть сельмечирькензэ – ды пшкадсь тензэ энялдозь.
– Аволь серьгедьса, а серьгедьсынек! Истя, Валюш? – витизе атянзо Натуш ды пшкадсь вайгелень апак вансто кресласо икелензэ аштиця Промо Валянень.
Тона копст стясь таркастонзо ды арась Натуш ваксс. Келейстэ, кенярксто пешксе сельмесэ, талнозь, варштасть вейкест-вейкест лангс ды серьгедизь яволявтозь моронть. Кудыненть сеске пештизь солыця ловонь чудикерькскень чольдердиця гайтть. Морасть кавто, верце ды алце, вайгельсэ. Марявсь, чудсть-чольнесть малавикс-малавикс, тундонтень кецниця кавто чудикерькст.
Вай, верьга, верьга, ливтить яксяргот,
Седеяк верьга ливтить идемкат…
Вай, козонь, козонь валгить ярсамо?
Вай, козонь, козонь валгить симеме?
Морось прядовсь. Лип шкас чачсь кашт. Сонзэ сеске сезизе колмо ломанень цяпамо. «Артисткатне», кеняркс ёжосо, карксамга нолдызь пряст, сюконясть ды витемтизь рунгост.
– Книгасонть морави «Эрде, ялгат, паро ялгат…» ютазь пингень ведьгеменце иетнестэ сеедьстэ морсевиця «советской» морось… Таго кавоненк… – велявтсь Ёгань Теряй вакссонзо аштиця морыцятнень ёнов ды, кедензэ меште видьс кепедезь, кевкстинзе: – жойневтьсынк?
Валя ды патякс тензэ савиця Нату-Натуш стясть седе ёнсто, варштасть вейкест-вейкест лангс, Натуш кхы-кхы козкстась кедькоморос, текень теизе Валюш ды, кунсолыцяст лангс ванозь, поладызь морамост:
Эрде, ялгат, паро ялгат,
Пурнавтано вейс.
Эрзянь моро моратано
Верьга вайгельсэ…
Цяпамот…
Теряй атя, ансяк прядовсть цяпамотне, шкань апак таргсе поладызе ветицянь тевензэ:
– Минек эйкакшпингстэ, те войнадо икеле ды сеске сонзэ прядозь, эрьва кува, покш чистэ-зярдо, клубсо-косо, марсевсь кезэрень лужаня кувака морось «Вай, лугась, лугась».
– Ужодояк, минек велесэяк аватне морсесть сонзэ! Содавикс ульнесь… Сыть, мельсэнь, паксясто, тикшень ледемстэ аватне – морыть, марявить веленть келес, те моронть.., – поладынзе Теряй атянь валонзо, серьгедсь таркастонзо, каятотсь Ашо Любань ций вайгелезэ.
Вай, лугась, лугась,
Пижине лугась,
Э-эх, вай, лугась, лугась,
Мазыйне лугась…
– теке келей сёлмо ашо локсей кепететсь менельс ды ушодсь цопазь чарамо пейделькасо ашолдыця пиже луганть велькска.
«Лугинеде» мейле гайгсь «Козонь чачнесь комолявкась?» морось.
– Эзиде сизе? – ледстизе книгань авторось, Дораень Теряй, эсь прянзо чумокс марязь, морыцятненень, ютавтызе паро ёжодо сияждыця вановтонзо икелензэ аштицятнень ланга, кончтась тенст ды поладынзе валонзо: – Кода кирьгапаренк? Эзть казякадо? Прядомакс а гайневтьсынк «Омбо велев максозь тейтерень урнема» моронть? Мекс-бути чуросто кармась марсевеме. Илязо лепия…
– Кода, Валюш, топавтсынек Теряй атянь мелензэ? – эрязасто ёнонзо велявтозь, пеедькшнезь пшкадсь васень вайгелесь, Натуш, омбоцентень, Валянень.
Ох, тынь вечкень сазорнэм-дугинем,
Оршинк-наряжинк эсенк ялгиненк.
Ох, каинк лангозон ашо палинем,
Ох, викшнезь-каярдозь мазый руцинем…
Прядовксось текекс: цяпамот, кувака лекстявкст, эрьвела панжадо мизолкст, кенярксто кувтдыця сельмть…
– Ванан, тейтерть, илыкенк маштома лангсо, сизиде, – мельспаросо, пейдезь мерсь ветицясь, Теряй атя, нурькинестэ наразь прянзо тей-тов чиремтнезь, – ансяк вана меельце энялдомам кодаяк уш топавтынк. Ледстинк «Ськамнензэ гармониясь…» моронть. Сон – од шкам. Секс… Пек содавикс те морось ульнесь сеть шкатнестэ, пек!
