Нуянь Видяз
Арсеман, монь арсеман…
Терентий Тимофеевич
Ошов ардтнемадон мейле ютасть зярыя чить. Кудос совсинь чуросто. Котьминь, кода сеедьстэ эрси, кардазсо: лаксинь-инзэдинь, рисовинь, чувтосто керсинь-пильсинь мазыльминеть, някат. Теинь вечкевикс, оймень витиця тевть. Эзинь стувтне ниле пильге лангсо чийницятнедеяк. Мезть кортамс, чуросто кие а соды, кодамо тевсэ сюпав велень эрицясь?
Апак учо панжовсь, чикорк мерсь, кудыкельде кардазс аволь покш-келей лазонь кенкшесь, ды стясь кенкшалкс лангс аволь сэрей, аволь човинеяк, кудоютконь халатсонзо Груня.
– Прядыть теветь, совак, ломань тенек сась! – пшкадсь тень кузтемпестэ цийниця вайгельсэнзэ ды, потазь, глянкадизе мельганзо кенкшенть.
«Мезе, кодамо ломань, косто, кона ёндо? – чиезь чийсть кевкстемань валтнэ пряудемган кедьёнксон таркаваст путнемстэ. – Совама, эно кода…»
Полавтынь кудыкеле кардазъютконь колошан, панжия стака кудокенкшенть, совинь кудос. Удалцькудонь вальманть каршо стуворнэнть экшсэ озадо аштесь, учось, васняяк сельмезэнь каятотсь, шержей пря атя. Эскельдинь малав. Асодавиксэсь ливчанясто, аволь атякс стясь. Венстизе, лангозон кецниця вановтсо ванозь, панжадо кедькоморонзо. Тень теия монгак. Вейкенек-вейкенек лангс ванозь, нардевстэ лепштинек кеденек.
– Терентий Тимофеевич. Седеем витьсак, карминдерят тень мереме Тимофеевичень таркас – Теряй леляй. Литературань лемем, текенекс, – Дораень Теряй, – ёвтынзе лемензэ ды кода меремс тензэ апак учонь инжесь. «Теряй леляй, литературань лем… «Истят валт велесэ эрямстон кинь кургстояк эзинь марсе, те мезе-бути од..,», – арсезевинь атянть кунсолозь.
– Монь лемдекшнимизь, – эзинь кирдеве – пейдезевинь, – Лёхакс, Алексеекс, мерить тень мекс-бути Алё, – ёвтыя пшкалема лемем каршон стядо аштиця аволь сэрей, моньшкан, коськана рунго, аволь монь кондямо парь эчке, атянтень. Явовсть «ояксчинь» кедькоморонок. Шаштынь эземне ды озынь Теряй лелянь каршо.
Сельмензэ атянть валдо-сэнть. Судозо аволь псакань, кувака, куншкасо будолмине марто. Алце турвазо верценть коряс аламнеде эчке, ды теде кургозо мизолдомсто-пейдемстэ тееви авечкевиксэкс. Секс правты мель кургонзо кирдемс пекстазь. Икеле валдо-чопода, ней умок уш конясто човоньс сияждыця шержей черензэ наразь нурькинестэ. Ансяк конянзо вельксэс кадозь веёнов судрязь черьпакшке.
Инжесь оршазь атякс, лангсонзо куштазь пона, нурька ожа, понкс потс нолдазь панар, раужо, вадрясто, секень вант, керяват, вадяшазь понкст. Сон аволь эчке ловажавтнеде, секс, веёндо ванозь, мерят, од цёра. Лиякс кодаяк, куш аволь келей лавтовонзо лангсо кандтни сизьгемень ветеде ламо иеть. Вана истямокс васенцеде стясь сельмень икелев, совась содавиксэнь тетрадезэнь Теряй лелям, эли, кода книгасонзо, – Дораень Теряй.
Кортазевинек кода-бути апак учо книгадо-ловномадо. Монень маряви, сюлмавксокс тенень ульнесть стуворонок вакссо диванось – вень ютавтнема таркам – ды пряпесэнзэ вальмалангось: лангсост кода понгсь вачказь кулялопатне, журналтнэ, книгатне. Сынь, бешом, ульнесть ушодксокс кортамонь кувтантень. Мелезэнь тусть, кадовсть превезэнь Терентий Тимофеевичень кой-кона мелензэ.
– Истяткак валт пачколесть пилезэнь: мезе, келя, икелень шкатне – галань толга ды раужо навсемкай ведь. Мезень сёрмадомат? Кодамо, келя, превей, васов тердиця-неиця литература? Кодат сёрмадейть? – мерекшнесь вейке «ламонь содыцясь». Сон сестэ истят чаво валтнэнь каршо, ёвтнеманзо коряс, мизолдсь ды тей-тов черькась прясонзо. Талномадонть, мельсэнь, сайсь вальмалангсто кодамо понгсь книга, панжизе ды сеске путызе мекев. Стакасто лекстясь. Озась седе ёнсто.
А стакаль чарькодемс, икелень аштесь превей, ламонь содыця, текенень, сэтьме, чевте кор, седеень мариця ломань. Истятнэде ней ютксонок, масторсонть, косо теевить ламо чопода, тандавтниця тевть, сави видькстамс, ламо а мерят.
– Э-э-э… Сёрмадсть, ды кода сёрмадсть! Жуковский, Вяземский, Пушкин, Лермонтов, Толстой Лев , Чехов Антон, Белинский… А Гомер? А стяко литературань ветицятне ХIХ пингенть лемдизь рузонь литературань сырнень пингекс. Келей эскелькст Советэнь властень пигстэ теезельть эрзянь литературасонть.
Кулдуркаев Яков, Раптанов Тимофей, Куторкин Андрей, Коломасов Василий, Радаев Василий, Абрамов Кузьма, Ганчин Анатолий, Сульдина Аня, Люлякина Серафима, Рябова Людмила…– каштанчинь кирдезь Теряй лелям ледстинзе эрзянь ды рузонь ине сёрмадейтнень лемест ды сэредьксэнь марязь поладызе кортамонзо неень тевтнеде. – Истят лемть, истят литературат, культурань истят тёкшт ды сеске, прок менельстэ прась, книгадонть копорьёнт велявтома. Састь тень кувалма кевкстемат: кие «чумось» ды козонь пачкоди книганть полавтыця, электрониканть, вельде ломанесь. Мезеяк, бешом, лия а теят: наукань ды техникань прогресс. Ломантнень ютксо конёвсо сюлмавкстне полавтовсть телевизорсо, интернетсэ, смартфонсо ды ляя-лия электроникасо. Ялатеке ламонь кувалма тевесь аволь «техникасонть» – ломаньсэнть. Мекс, каня кие а мери ловномо электрононь книгат?
Ёгань Теряй ёвтызе мелензэ, стакасто лекстясь, оймась.
– Виде теяк, Интернетэсь, «чумодо» явозь, – ине вий. Ансяк муеви се, кона ёвтасы, ков вети сон, киберэсь, ды ков пачтясы ломанень сыменть? – поладынь Теряй лелянь, псистэ кортыцянть, валонзо, ёвтыя мелем, максынь питне икеле ёвтазь сювань сталмо валтнэнень.
Терентий Тимофеевич кунсолось, чатьмонсь. Кончтнесь сэнь сельмензэ, ваннось лангозонок, мезе икелензэ. Апак учо пстылязевсь ды пшкадсь тенек, кудонь азортнэнень:
– Алексей ды Груня, вандычинь ютазь садо миненек, учотано. Варштасынк, кода лексетяно, мезде-кода мелявттано, – мерсь шержей пря инжесь таркастонзо эрязасто стямсто. Витизе рунгонзо ды поладынзе валонзо: – Зяроце ие уш эрятано Пичелесэ, вейкенек-вейкенек седе малавикстэ а содатано. Кецнян, содамо карминь: кудосонк явиде мель, тарка книгантень. Ней истямось чуродояк чуросто вастневи… Ловноманть каршо кшнинь пирявкст стявтсть. Лездыть тенень эрицятнеяк. Ярмактнень, сюпавчинть, пешксе пекенть мельга правтомась кравтызь книганть ломаненть ойместэ.
– Сюкпря, Теряй леляй, паро валот ды тердемат кис, сатано апак кавтолдо, – мерсь каршо Груня, коник чиресэ аштезь, эсензэ ды монь пельде.
– Натой тон, Груня, ды мон – чачомань коряс ве велень, аволь тестэнь, те шкас эзинек вастневе. Ильведьксэнть витема, – янксезь, теке марто муст-муст пейдезь, ёвтызе мелензэ атясь лисемадо икеле, кенкш каршо аштезь. – Те ошсо ломантне явовить векедест-вейкедест, велесэ лият тевтне.
Атясь кортась мартонок, лангозонок ванозь, верьга вайгельть. Чарькодия куроксто: пилензэ Терентий Тимофеевичень аволь одонь – камажат. Абунгалемс а савкшны, иензэ… эскелить кавксоньгементнес.
…Урядыя книгатнеде-мезтнеде коникем. Седе ламотне кельгсть вальмалангс. Штавтыя тавадксонть. Толонь вельмевтеме, ловномо эзинь карма. Копачинь велькссэнть. Конинь сельмень. Удомам ёмась. Прок тандадсь. Теке мерят, кезэрень гректнень Морфий пазост допрок стувтымим.
Кувать майсевтсть эйсэнь моданть лангсо эрямонь зэмеденть кевкстематне, кирдевсть превсэнь Теряй лелянь марто вастовоманок, мартонзо кортнематне. Ютасть икельган чинь-чоп эвтезь-чаразь теезь тевтнеде ледстнематне. Поладксокс тенст ледсь мелезэнь лавкасо Наталень неемазо. Гайгезевсь седеень пачк ютыця сонзэ вайгелезэ, ды, окойники, ваязь ваинь удомань вечкевикс эрькентень. Удынь чинзэ лисемс, прок кулозь.
Истя вана чи мельга чи, ков мельга ков, кеняркст-ризкст, ды а редясак, кода прядовить неть читне-ковтне, прядови эрямопингесь. Мезекс сакшны ломанесь моданть лангс, мезень кис, мезень тееме? Ломанесь… А мон? Маней валске чипаенть лисеманзо лангс кецнезь ванома? Аволь апештевиця пекень пештямо? Арась, арась! Ансяк аволь тень кис.
Казнеть эрсить эрьва кодат…
Сыргозинь. Велень а куш а каш. Груня эйстэнь «васоло», икеле кудосо, уды. Курок сонгак сти.
«Мезестэ ушодомс?» – сельмень апак панжо содавтымим кевкстемась. «Мезть кевкстнят? Каня а содат? – кевкстимим модапотмонь кодамо-бути эчке, гавзара-казямо вайгель. – Васняяк, умок содат, пештямат зобняст, симдемат кардазсо оркиицятнень. Ветямат лугалангс, сюлмамат цицигас, симдемат вазтнэнь, каяма, седе котност, саразтнэнень…»
– Теня, саты теть лужалемс! Аволь боярат, – панжинь каракшон, меринь марямга эстень ды брикстядия лангстон кизэнь шожда вельксэнть пильгепес.
Стинь. Витния мельган таркам. Нарынь. Ютынь шлямо-нардамо. Кельме веднесэ шлия-ёрвалдыя чамам, пансия, теке тенстьсэ тенсия, рунгостон кадовикс удомам. Оршнинь ды лисинь кардазов.
«Аштека, аштека! А тон, атя, арсик, мезе кармат каземе Натальнень вандыде мейле?» – апак учо сыця те мельденть тарск теинь. Теяк. Мекс ансяк – Натальнень? Тувталось кодамо? Чачома чизэ? Аволь. Эно мекс сонензэ? Казьсынек, мезе раматано, Груня марто кавонек пельде. А мезе, бути Наталь лемс анокстамс мазыйстэ сёрмадозь-артозь картыне? Ды стихсэ… Кецневтьса, кеман! Мекс – таго куродымим теке кевкстемась – ансяк Наталь лемс? Кода тень лангс ваномо карми Теряй лелям? Содама текенекс тувталонть, мезень кувалма сёрмадозь-кучозь. Арась-арась – те а казне, те някинесэ пакшань налксема.
Монсь казнетнеде истя меревлинь: ве таркасо ботамот, эвтемат! А вечкеви тень те, кадык кезэрень, коесь. Мекс – а содан. Паряк, нузяксчись пильгть путни? Иетнеяк… Мезекс, видеяк? Казне – те максомс лезэ эли теемс мезеяк вечкевикс, важов, мезеяк эрявикс малавиксэть туртов. Сонзэ теемга эряви тувтал: мертяно, урьвакстома-мирденень лисема, нурькинестэ – полыямо. Цётавкс чачома чи – комсеце, колоньгеменце… Весемеде ламо кецневтить ломантне вейкест-вейкест Од иень вастома читнестэ ды, секень вант, аволь седе аламо, Авань чистэ. Аватне, видькстамо, казнень каземань кувалт цёратнень коряс седе дошузт. Пшкадема Грунянень. Сон кол неть тевтнесэ, профессор…
Каземань коесь ульнесь советтнэнь пингстэяк, ансяк казнетнень покш – чист, питнест ульнесь ламоксть лиятат. Аволь кода ней: урныгай – аволь ве миллиононь питнесэ, квартира, кудо – кемень этажонь сэрьсэ, яхта, океансо усия… Истямо казнень макснемадо эзь марсеве, онстояк эзь некшневе. Сестэяк, содави, эрьва мезть вастневсть, ялатеке урныгайс-кудос эзть пачколе. Мик версетнеяк. Казнекс ульнесть лембе, арсема марто сёрмине, почта вельде кучневикс картыне, патефон, книга, паро, тантей чине ведень флакон, вечкевиксэть туртов мазыйстэ викшнезь пацине. Шкань ютазь паро казнекс лововкшность радиолатне. Максневсть, теде башка, Ленинэнь ды Сталинэнь лемсэ Казнень лауреатонь лемть. Мезе ульнесь – ульнесь. А велявтсак. Се, ней уш умонь, эрямостонть аламо мезе ванстовсь. Аволь весементь, ламо мезенть – ванстомаль.
А бути Натальнень паро книга рамамс? Кинь, кодамо авторонь? Косто? Сави ошов ардтнемс. Тевесь эно малавгак аволь тень эйсэ. Мезе ашти монень тов пансемась! Ловныця-аволь? Вана мезде арсема! Казьсак казнеть, сон лангозонзо а варштыяк, усксевеме карми. Мезекс те? Ютазь шкатнестэ книгась ульнесь, кадык аволь эрьванень, паро казнекс. Ютазь шкатнестэ, ней…
Ней? Ней… Седееть нуваргады: чинь куншкава тол мартояк а муят ловномань вечкиця. Ков сынь ёмасть? Мезе мартост теевсь? Мейсэ тувталось? Визькс – книгась велявтсь …шукшокс. Чумо телевидениясь? Истя, сави меремс, улияк. Астяко теицязо, кона чарькодекшнизе, мезес ветясы ломаненть сонзэ «эйдезэ», те самай «сэняжа сельмесь», кудосонзо куломазонзо телевизор эзь кирде.
Кода полавтовсь шкась ды эрямось!
Чикуншка. Кудыкеле каинь пильгстэнь эрьва чинь рудазов колошан, совинь тутмань пештямо. Груня икеле кудосо утюгсо вадяши пельскоське муськемат. Озынь каршонзо диванс. Кевкстеманть, конадо арсинь валскень перть, кирдинь превсэнь, максыя вадяшицянтень.
– Теня, содат мезе, вандыде мейле тердимизь инжекс. Чавонь кедть, эйкакшоськак соды, а яксить. Икеле тень кувалма превть яжамс эзь савкшно. Суликанть зепс ды – чийть! Ней, истя молиндерят, ламот ловтадызь кевень пингень ломанекс. Ютась шкась, зярдо «валютакс» ульнесь пельлитрась. Ёвтык, мезе анокстама тенек, мезе саема?
– Шожда меремс, саема… – аламос лоткась тей-тов яксевтемеде пси утюгонть Груня, путызе икелензэ «стядо», кепедизе вановтонзо мирдензэ лангс ды ёвтызе мелензэ: – Мертяно, мезеяк оршамопельтнестэ… Содама, кодамо покшолмань, кодамо тюсонь, кодамо лувонь-модань, коцтонь… Марят? Эли сайсынек кедьгень масторонть. Мезть эйсэнзэ ансяк арасть! Мезе каземс? Кечинень-кечине – ракамонь тевть. Истя ансяк калмамсто явшекшнить. Текенень, мольтяно аволь кодамояк юбилейс. А мезть майсевемс. Ардтнят валске Валюшонь лавкав ды рамат покш-ламбамо арбуз. Седе вадря казне, зяро иля вешне, а муят, – превс путымим псиденть кудонь панжадо сиве халатсонзо Груня, поладызе тевензэ.
– Виде! Виде – седе а ков! – серьгединь, теке эйкакш, кецнезь. – Кода тень эзь панжово те – превс эзь саеве? Кие эзизе марсе валмеревксэнть: аватнень черест кувакат, а превест… Вана теть нурькинеть! Сень кис яла пря шнатано: минь, минь, цёратне, превейть, докат! Эйстэст вейкенень теяк эзь чулгово – рамамс казнекс арбуз! – шныя, аноколинь «сырнень валонзо» кис Грунянь турвас паламс.
Вандыде мейле
Э-эх! А шказо уш ниленть трокс кирнявтсь, ашолгадсь. Саты теть сэставтнемс-мерькамс ацамотнень. Зюнзютне учить. Атякшоськак астяко кирьгапарензэ разди, ледстни эседензэ ды зярс чувто лангсо авакштонзо.
Штавтыя лангстон лембе, истямо вечкевикс вельксэнть, ацые таркам ды карминь пурнамо-сэрнямо, эсь мельган якамо.
Ушодовсь од, лия чи. Менелень прявтось эрьвела, мизолдыця вановтсо келейстэ вансь вальматнева ды валдонь кельсэнзэ тердсь мартонзо эскелямо, вейсэнь тевень тееме, тердсь ушов.
Стясь тона кудосо, пурны ацавксонзо, састыне козкстни, васты маней чинть Груняяк. Лисинь ушов, саинь латалдо койме ды ютынь кудонок удало модамарень пирезэнек. Шказо, таргамат. Чемень сэвинзе лопаст, касомаст касовсь.
Коймем сялгавтан куракштонть аламнеде потазь – илязо керяво модарне. Ванан текенекс илязо мараво, вельтяво, илязо кадово модас. Аволь покшт тедеде модамартне. А кона ёндо улемс вадрякс, пиземеть ульнесть – чеменесь сэвинзе. Кенярдт, яла мерить, сенень, мезе ули, мезе пазось макссь.
Коймем ды кедень-пильгень содыть тевест, путыть вий – таргить кастозенть. Велявтови ундокс, омбоце… кеменце… Капши, а кадови чувицятнеде пряудемеськак. Эйсэнзэ мельтне кашкить-эвтить пизэсэ коткудавокс. Сынь оймамо а содыть. Ансяк удомсто энгамить. А содыть оймамо Черькайтнеде арсематнеяк. Неемс Наталень, кортнемс Теряй лелянь марто. Сон неявсь, зярдо сакшнось тенек, валонь кирдиця ломанекс, редия теньгак – сон келейстэ ды домкасто арсиця, ламо ловныця. Те истякак содави. Апак ловно, ламонь апак сода аволь романт, ёвтнеминеяк аволь сёрмадо.
Вастовтано – карман седеяк парсте содамонзо. Натальдеяк… Кие сон, кодат содамочинзэ? Косо, мезекс важодсь пенсияв туемадо икеле? Вастовтано – теевтяно, кемеви, седе малавиксэкс. Кие, кода-мезе, те весе… Неемс, варштамс сэнь эрьке сельмезэнзэ, марямс… Вана мезе превстэнь а лисни, вана мезе монень эряви васняяк, вана мезе уски, терди тензэ…
Арсезевинь лия покш тевде – одс вельтямс, кадык зярс аберяньстэ ашти, кудонок, путомс неень шкань лато, келькшсэ вельтязь жестень.
Сась Груня. Комась, кундась мода лангс ливтезь модамартнень кочкамо ды ведрас веркасто кайсеме. Тоцк-тоцк, байк-байк… – маряви кайсемстэст велень келес. Эрязкалезь, теке сараз поксари моданть кавто кедьсэ, иляст кадово модартне модас. Нетькстнэнь ёртни-вырновтни ве таркас.
Тевенек моли увсо. Зярдо пешкедсть кедьгетне – эйстэст кеменьшка, – сялгия коймем ды ушодынь латалов кандтнемест. Явномадост мейле – видьмекс, ярсамс, ракшатненень – нолдасынек кавто лазсто стазь олаккева мацтс. Молевкс кавто пешксе ведра марто вейке, омбоце, колмоце… Зяроксть илязо уле, превтне тевест содасызь, пильгетнеде-кедтнеде косояк а кадовить – мезде ансяк а арсить!
«…Течи прядомальть, ансяк, пелян, а прядовить, вете соткат, аволь аламо. Кажось эно апокш, ванды «сявордсынек». Мейле рунготнень ёрвалдомат. Сисем часос эряви улемс анококс. «Вастовтано Черькайтнень марто, мейле мезе, мезе седе тов? Мезе, мезеяк арась…» – бизмолдсть прясон кевкстематне.
«Кодамо панар оршан? Маряви, раужо кикс марто ашонть, моли тень. Туить куштаз, валдо тюс понкстнэяк. А Груня кода пурны-сэрни?» – нурясть, полавтневсть ловажань кудосост мельтне стака ведрам марто тей-тов яксемстэ.
Таго саия кедезэнь койменеденть, таго карминь сявтнеме нетькстнэнь, бажинь таргамс модамартнень лангс, неявост ды ён улезэ сынст кочкамс. Кочкак, Груня, поксаряк, пештть кедьгетнень! Неть ансяк валт, сонзэ эзь саво кармавтнемс, тейсь тевензэ те аволь веркатнестэ ломанесь – кияк мельганзо а кенери. Сави шнамс, кол авась пирень-кудонь пень а содыця тевтнесэ. Варма, а мерят, аволь эрязкалицятнеде, тень лангс апак вано, тевенть теи куроксто ды вадрясто.
Котьминек чикуншкас. Ярсынек-теинек, лекстинек ды, сиземанть изнязь, поладынек ушодозенть. Телень перть теде-тонадо байтяк эряви, эряви эстенек, ошсо эриця эйкакштненень, аволь аламо эряви кардосо кирдевицятнененьгак…
Пе путынек модамарень таргамонь мелявкстнэнень чивалгоманть якстерьгадома шкастонзо. Чипаесь, кода миньгак, арсесь оймсемадо, арсесь шка максомс экшела менельсэнть сюрокс мендявозь сэняжа муворонтень. Сиземадонть эскелинек Груня марто стамбаро, пильгень ускозь, ялатеке мелень витезь – теинек чинзэ перть ламо. Молинек чатьмонезь. Кортасть кисэнек мацт лангс кандтнезь ведратне. Пиземеде пелемс а сави, пеледест ламо модаренек лато алот.
Арсят истя – лиси лиякс
Кудосо шлинек-ёрвалдынек чаманок-кеденек, нардтнинек шлямонькаенть ваксс эскес понгавтозь чевте нардамосонть. Груня шкань апак ёмавтне кундась стуворонь анокстамо. Мон оршнинь кудокс ды озынь коникс, оймсемань вельть вечкиця Нузяй ваксс, а истяко чеертне кудыкельга-кува чийнить ошконсо ды промкст ютавтнить. Педявтыя вановтом кулялопасо теде икеле муезь, мелезэнь туиця статьянтень. Ловнан, лексян-пувсян.
Вальматнень копачинзе вецана сув. Букватне «вишкалгадсть». Кармась сундерьгадомо. Груня вельмевтсь тол.
Эзинь кенере ловномонзо статьям, апак учо вить бокас шоркадимим истямо пштикс, эль эзинь серьгеде пиже-ожо вайгельсэ. «Те таго мезень апкаж?! Истямо сэредькс вестькак эзимим куроле…» – чиезь ютась пряван.
Кеминь, юты. Стинь. Тарказост, вальмалангс, путынь книган-газетан, ацыя таркам. Мадинь кунст. Венстинь пильген. Зярс-бути сэредьксэсь аламнеде потакшнось. Таго ушодсь карамо. Велявтынь пеке лангс, оймамо эзь арсе. Видькстынь, мезе мартон, Грунянень.
– Теня, ютак медичкантень, паряк, ёвты мезеяк, потмом палозь палы, – сэредьксэнть лепштязь, сеедьстэ лексезь меринь ним туртов. Сон мезеяк эзь мере, каясь мезе-бути ланганзо ды лиссь. Кадовинь ськамон. Пштикстнэ седеяк сеедьстэ, капшазь кундасть сялгонеме. Мезе, кодамо тюниха марто ансяк а вастоват эрямосонть!
Аволь ламо шкань ютазь келейстэ панжовсь кенкшесь, ды мельга-мельцек совасть велень докторонок Сюватонь Галя, азоравадонть аламнеде сэрей, мельганзо Груня. Галя шумбракстнесь, ютась коникем ваксс, стядо аштезь, таргась юдминестэнзэ градусник ды максызе монень – путомс кавалалов.
– Ней ёвтнек, кода ёжот марят, мезе мартот теевсь-лиссь. Иля эрязкале, – мерсь чевте вайгельсэ, чамазон апак кончтне ванозь, прок сельмень ёвтасызь, мезе эйзэнь педясь.
Мон ёвтния, кода-косо маряви сэредьксэсь, зярдо ушодовсь, кона таркасонть, куролимем-арась икеле. Ормань очобицям кунсолось, вансь лангозом. Шканзо ютазь таргия градусникенть ды венстия учицянтень. Кандызе сельмензэ малав, арсезевсь ды «кецневтимим» «аппендицит» содавикс валсонть.
– Эряви тердемс капшакай, – ёвтынзе неть валтнэнь, шаштсь аламнеде коникем эйстэ, таргизе юдминестэнзэ телефононзо ды кочкизе эрявикс номерэнть.
Монень капшакаень тердемась, мельганзо каштось пачкодсть кода-бути гонгиязь ды теке каськасто. Пеень сускозь, кониксэнть велявтнезь-менчевезь кирдинь акирдевикс сэредьксэнть. Груня ды Галя озасть, аштесть чатьмонезь.
«Кода монтемень Груня карми прядомост модамартнень – превс а саеви. Мезе ськамонзо теи? Э-э-э, цёра, тонь допрок бриндат новольсть . Тонь каня тоначив саить эйсэть? Сат. Сат, ды стамбарнэ-стамбарнэ прядсынк. Э-ка! Муить мезде мелявтомс.
…Ванды сисем чассо вастовома Наталь марто. Вастовинь… Кортнинь-калякинь Терентий Тимофеевич мартояк. Учинь, учинь те часонть! Учовсь… А стяко кортыть: арсят истя – лиси лиякс. Аволь весе эрямосонть ашти эседеть, аволь. Ней зярдо, кода вастовтано? М-хы, пря яжат… Ули телефон. Ули… А косто мусак номерэст? Кодаяк муса…»
…Совасть, талай чокшненть лангс апак вано, нупалентень, козонь путымизь, ашо халатсо, сэрей, ведьгеменьшка иесэ цёра-врач ды почаня пря, эчкела рунго, мизолксонь казниця од тейтерне, медсазорнэ. Содылинь: те цёрась – Пичелень, фамилиязо Пивцайкин, лемезэ Пётр Иванович.
– Ну, кодат теветь, откерь? Кода ёжот марят, мезе лангс пеняцят? – лангозон ванозь, пшкадсь тень пеедькшнезь, паро ёжосо, ормань очобицясь. Саизе кедьстэнь градусникенть, педявтызе вановтонзо лангозонзо.
– Теня, – лавшо вайгельсэ ушодынь ёвтнеме ормадон…
Докторось кайсевтимим. Чатьмонезь токшизе-вадяшизе пекеалксом ды мерсь вакссонзо аштиця ашо кавшаня прячерь медсазорнэнтень:
– Нейке, шкань апак усксе, анокстынк операцияс, – ды кавонест вейкест-вейкест мельга лиссть нупальстэнть.
Кадовинь ськамон, эсь мелень-арсеман марто. Марсинь, келя, те керсемась-стамось аволь стакатнеде, шождасто тееви ушодыця хирургонтеньгак. Ялатеке эрьва мезть лиснить те «шождаканть» ютавтомстоэяк. Косто а косто саевсь ды совась потмозон кодамо-бути ризкс-навола ёжо. Эрьва мезть лисснить… «А! Мезе ули – се ули!» – оймавтнинь эсь прям, кшувавтнинь превстэнь чопода мельтнень.
Сёлмон нолдтнинь стяко.
Нупальтнева валскень ютамо шка. Кой. Састыне панжовсь сэрей ашо кенкшесь, ды совасть тенек Пётр Иванович ды, кода свал, медсазорось. Эскельдясть коникем пес.
– Ну, кода ёжот марят, откерь? – коникем вакссо стядо аштезь, пеедькшнезь пшкадсь тень исень валсонзо ормань менстицям. Керявксом эзизе варшта. Саизе венстезь кедьстэнь градусникенть ды ютавтызе ланганзо вановтонзо. – Ниле чинь ютазь, цёра, улят кудосо. Сырькаеть вакссо кармат ёжот витнеме. Ансяк, ва, ирдезт иля яжа, стакат иля кепсе, ве таркасо мель путт а аштемс, яксек састыне.
Кунсолынь ды арсинь: кодамо паро профессия кочкакшнось Пичелень те эрзянь цёрась. Кода а сюконямс сырнень кедензэ кис?
Лездыцязо та-мекс лиссь. Палатантень апак учо кадовинек кавонек. Пётр Иванович озась каршон чаво коникенть чирес ды, кумажанзо лангс нежедезь, лангозон пштистэ ванозь, апак учо кортазевсь допрок лиядо.
– Ванды, содат, таргочи, кочкамот. Кинь кис кармат вайгелеть максомо? – мизолдозь, валаня кемевикс вайгельсэ кевкстимим Пивцайкин. Чатьмонезевсь. Учось, мезе ёвтан.
– Кода кинь? А мезть кортамс, Мештевень, содазь… А мезе? – кониксэнть кунст мадезь аштезь, апак арсе ёвтыя, мезе кирдевсь превсэнь. – Сондензэ, лиянь, а кинь.
– Мон мезеяк а мерян, эрьванть эсензэ арсеманзо… А мекс аволь Прявтонть кис? Вант, кода мелеть, ансяк монь сялдовтсамак, а максындерясак вайгелеть Прявтонть кис. Мерить тень: эзик топавто мерезенть, тень кис, парсте содат, а шнатадызь. Ярмакт тень-сень рамамс а максыть… – нусманясто мерсь мезе мериксэль каршон аштицясь.
Кунсолынь прявт врачонть, ды потсон киштсть, невтнесть сюрост ды пижнесть ошонь келес вардолевкст: оно, оно кода прявтт пурныть, оно кода масторсонок ветявить тевтне – кенгелезь, тандавтнезь, салазь, секс варявт зепенекак…
Саимим седейскириця, нусманя ёжо.
Сеске Пётр Иванович ламо содыцясто, превей, шназь цёрасто теевсь чаво пряпотмо, сэрьс-чамас дёкуш, тутора рунго ломанекс. Лангозонзо ванозь, нусмакадынь, мелем, кой-мезе тензэ ёвтамс, – ёмась. Жаль тень марявсь.
Ломанесь, кадык аволь эрьвась, улезэ ломанекс, валдо мельде пешксе пря, ванькс ойме ломанекс, аволь налкшкекс кинь-бути кедьсэ. Яказо сон эрямонь китнева прянь кепедезь, каштанчинь содазь, азорокс. Улевельгак истя…
Кавто-колмо чинь ютазь пшкадинь Пётр Ивановичнень – седе курок, шкадо икеле, нолдавлимим кудов. Грунянь кедьсэ, меринь, прядса пичксемань курсам. Колмоце чистэ, чикуншка малава, окойники, вановтом вастовсь сэнь-пиже коня, валдо сельме кудом марто. Лу-уньк мерсь седеем кенярксонь ёжодонть. Исень нусманядонть эзь кадово челькинеяк.
Кудо, кадык сон аволь монь лемс сёрмадстозь, путынь эйзэнзэ зняро, зяро сонзэ неень питнезэ. Ялатеке сон кемевикс лато: эжди цят якшамотнеде, вансты юргозь-вешкезь пувиця ушонь ды эрямонь бурятнеде.
– Я! Те тон кода шкадо икеле? – эль кенеринь мельган кудонь стака кенкшенть пекстамо, вастымим Грунянь човине-сэрей вайгелезэ, эскельдясь каршон. – Мерекшнить, вандыде мейле нолдатадызь.
– Истя уш лиссь, – эзинь карма ёвтнеме, кода-мезе ульнесь педе-пес.
Оршнинь одс, ды совинек Груня марто икеле кудос, озынек чевте диванс.
– Кода прят марят? Ёнсто ютась керсемась-стамось? Лия мезеяк эзть керя? – пеедькшнезь кевкстимим Груня. Озась седе ёнсто, нежедизе кутьмерензэ диванонь удалксонтень, учось.
– Теня, эзинь маря, эряви варштамс… – Грунякс пеедькшнезь меринь кевкстнеманзо каршо.
Ёвтния педе-пес, кода ульнесь.
– Пекеть вачсь? Ярсамо кармат? Оно мезе, – кепедизе, «оно»-ть лангс лепштязь, вайгелензэ, юхадсь вить кедьсэнзэ мештензэ икелльга Груня, – гайневтсь Терентий Тимофеевич. Кевкстнесь, мекс эзинек сакшно тенст, кода кортазель, инжекс. Ёвтыя тувталонть. Истямо мель ёвтась: садо, зярдо савтадо. Максызе телефононь номерэнзэ. Оно, вальмалангсо конёвпанкскесэнть. Мусак. Икелест, видькстан, чумо теинь – эзинь гайневте асамодонок, – паро кулянь ёвтыцясь сурсонзо нардынзе турванзо, стакасто, виень путозь витемтизе рунгонзо ды ютась удалце кудов.
– Паро, колмо-ниле чинь ютазь варштатано, – меринь дивансто стямсто ды эскельдинь Груня мельга. Мария, пекем каравсь, ледстни пештемадо. Озынь свалшкань озамо тарказон стувор экшс. Учан.
«Эрь эно, стяко пелинь, стяко мелявтынь, – арсезевинь, – лиссь кортазенть коряс, читне ансяк аламнеде шаштовсть. Мезе теде полавтовсь? Сюк пазонтень, Везувий одс эзь вельме, Равгак пелеве ёнов чудеме а арси. Колмо-ниле чинь ютазь ультяно Черькаень кедьсэ. Содамс, кода оршазь вастсамизь Наталь? Пароль, кода сестэ, васенцеде вастовомстонок, – нурька пильге, чопода-сэнь човине коцтонь понкст, сэняжа тюс, теке менелесь, ожавтомо ковтыне. Те уш кода пазось мери. Иненть а кармавтсак».
