полная версия

Михаил Кривошапкин
Мявму икэн

Гя

 
Бэйду гядук ай ачча,
Гямачин тачин биврэн,
Ибга харак бисикэн,
Як-да ҥэлэмэн эсни бис.
 
 
Хөнтэ нунмир эникэн гөн,
Бэй бэкэчин өмэн,
Хоя гирки – бини эҥэен,
Дёмкатникан эр төрду били.
 

Оран

 
Өтэрэп иҥэньси анҥанилду,
Эр ай төрэлдули көсчирит,
Өтэл дэбэмси долбанилду
Оранси-нюн биникэн тэгэттит.
 
 
Мут дянилти оралчимҥал,
Айанна куҥалти ноҥартан,
Ханиндюр эҥэе көсчимҥэл,
Эр бугли долчибтан икэлтэн.
 

Наматкар

 
Тек адыкун оникан эмэптэп,
Иҥэньгидэ төрли көсчиникэн,
Мут дюлэп хөнҥилти нимкалтан
Хоя эҥи бисит гөникэн гөнитэн.
 
 
Тыкыча анҥани амардадун,
Хоял көсчимҥэл биситэн,
Эгдьен нам холидун
Бисит, мухолду тэдьэникэн.
 
 
Тар төру, билэкэт гэрбутникэн,
Ирэв тарав хари бисит,
Хол яван, мэҥэнь-дэ гэрбэвэн
Тэгэттит, айаннав одяникан.
 
 
Эдилдэ омҥар эвэсэл,
Өтэрэп мэн дялвур,
Он эр төрли гирканикан,
Өмэтту чакабникан хэдьэнитэн.
 

«Көчукэн, хатарси хотараму…»

 
Көчукэн, хатарси хотараму,
Тачин-да бими гиркарам,
Бинидув нөлтэми холканан,
Ҥэрин инэҥилбу эмурэн.
 
 
Биниду эрэгэр биннэн,
Тэгэн кэнелич ичуврэн,
Аич нөлтэму холкали,
Ҥэрин биниву төҥкэли.
 

«Городту тэгэттэм…»

 
Городту тэгэттэм,
Тек эду хупкуттэм,
Мэн биний хотарман,
Эр эдук аҥамсам.
 
 
Би ҥэндим бинили,
Ач ҥэлрэ, ач хэтлэ,
Эвэды төрэму
Эмҥивэн хавнидин.
 

«Тар нимкан дюллэ орин…»

 
Тар нимкан дюллэ орин,
Дукулбу одэн-дэ төстин,
Хэвки нянинли бисин,
Ариҥка хэргитки тэгэттин.
 
 
Хоя анҥани елтэнин,
Тар төрли муһол бинитэн,
Нёбати кудяй эвирибэн,
Хамал игэч хамалкаттитан.